Oé-Cusse, 11/04/2024 (TVDJ) – Komunidade sira ne’ebé hala’o negosiu iha merkadu Numbei, Suku Costa, Postu-Administrativu Pante-Macassar, Rejiaun Administativa Espesial Oé-Cusse Ambeno (Raeoa), kestiona kona-ba haris fatin publiku iha merkadu Numbei ne’ebé konstrui ona iha tinan 2023 to’o agora la loke ba públiku atu utiliza.
Tuir Liusa Saet nu’udar negosiante senti triste tanba durante tinan barak ona iha merkadu la iha sanitáriu atu públiku bele utiliza ba nesesidade loron-loron.
“Ha’u hahú fa’an sasan iha ne’e durante tinan wualu (8), ona maibé la iha sanitáriu ne’ebé mak ta’u iha merkadu, atu ema hotu utiliza ba nesesidade loron-loron nian, senti triste tanba bainhira ita presiza ba nesesidade tenki, ba husu fali viziñu sira ne’ebé besik, se la’e ita ba tu’ur de’it iha ai laran sira. Dehan Negosiante husi Pasabe ne’e.
Nia haktuir tan katak, tinan kotuk ne’e estadu hahú konstrui sanitária públiku iha merkadu ne’e maibé la hatene tanba saida to’o agora haris fatin ne’e rasik seda’uk loke ba ema atu bele utiliza.
Iha parte seluk Domingos Elu, ne’ebé kompradór informa, haris fatin ne’e imporatnte tebes ba negosiante sira ne’ebé hela no buka moris iha merkadu, inklui mós komunidade sira ne’ebé kompras bele utiliza ba sira nia nesesidade.
“Ha’u bele dehan susar bainhira sanitária públiku iha merkadu ne’e la iha tanba ita presiza urjenti ita tenki halai buka fatin hodi responde ba ita nia nesesidade, fatin ne’e mak la segura ita tenki tahan to’o uma,, ida ne’e ha’u hanoin ita bele hetan moras”. Dehan Domingos
Nia hatutan tan parte relevante inklui jestaun merkadu Numbei rasik, atu buka lalais solusaun hodi responde ba preokupasaun komunidade nian liu-liu negosiante sira iha merkadu ne’e rasik.
Hatan ba preokupasaun ne’e jestaun merkadu Numbei, hateten kona-ba sanitária merkadu iha ona, konstrui iha tinan kotuk, no iha fasilidade kompletu hanesan ahi no mós be’e mos, maibé seida’uk atu loke ba públiku tanba seida’uk iha pesoál ne’ebé atu halo seguransa no kliner atu hamós bainhira komunidade utiliza.
“Ha’u bele loke ona ba públiku atu utiliza maibé, seida’uk iha pesoál seguransa ka kliner ne’ebé atu ta’u matan ba sanitaária iha ona. Nune’e ita seida’uk atu bele loke hodi bele utiliza. Tanba presiza tebes seguransa ka kliner atu bele hamoos hodi nune’e labele fó impaktu ba komunidade sira ne’ebé hela besik”.Dehan Fernando Sousa Nekat
Nia hatutan tan katak, husu governu da-sia bele koloka seguransa ka kliner hodi bele halo servisu iha fatin ne’e atu bele tau matan ba fasilidade sira, inklui bainhira públiku sira utiliza sanitáriu.
Tuir ovservasaun Jornalita TVDJ iha terenu nota katak, sanitária ne’ebé konstrui ona iha merkadu Numbei, moru hale’u inklui uma iha kuartu rua, no sanitariu tolu mak iha laran, maibé portaun xave metin, no dau-daun aredores utiliza hodi halo toos.
Reportajen : Flavio Suni.
Foto : Flavio
