Dili, 3 Jullu 2024 (Media Democracia)-komunidade Iria de Deus ho profisaun hanesan soru-tais hateten, tais lokál ne’e hanesan kultura husi ita nia beiala sira no ita tenke hatutan ba jerasaun foun.
Iha entrevista ho komunidade Iria de Deus hateten, iha munisipiu ermera sempre uza tais lokál bainhira iha serimonia kultura ruma, tanba ne’e sai hanesan tradisaun ida ona husi ita-nia bei-ala, nune’e ba jerasaun foun tenke banati tuir. Aleinde ne’e mós jerasaun foun sira tenke aprende soru tais, tanba tais mak hatudu ita-nia identidade
“Ha’u soru tais ne’e hahu husi ha’u nia-oan sira sei kiik to agora sira boot ona no balun forma ona familia no balun sei eskola hela, ha’u nia oan sira mós soru hotu tais, tanba ha’u hanorin sira no dehan ba sira katak tais lokál ne’e hanesan kultura ne’ebé mak hahu husi ita-nia bei-ala sira mai to ami no ba imi bei-oan, Tan ne’e tenke soru nafatin tais atu labele halakon ita-nia identidade.” Dehan Iria
Nia hatutan liután katak, Iha munisipiu ermera tais ne’ebé sira soru diferensia husi munisipio sira seluk, liuhusi nia motif no kor kabas ne’ebé sira uza, aleinde ne’e mós fator diferensia tais tanba bazea ba kultura no tradisaun ne’ebé la hanesan
“Tais sira ne’ebé ha’u ho oan sira soru ne’e rai hamutuk lori ba fa’an iha merkadu tais lokál kolmera hodi hetan netik osan ituan sustenta nesesidade familia, selu mós oan sira nia eskola no balun hola hikas kabas hodi soru fila-fali tais. Tais sira ne’ebé mak ami soru lori ho liman ne’e fa’an ho folin ne’ebé diferente tebes, iha balun ho folin $25 to $50, tanba tais lokál ne’e ho kualidade di’ak.” Hatutan Iria
Nia salienta liután, hanesan povu ida ne’ebé hela iha nasaun demokratiku husu ba governu atu iha ideia di’ak ida atu promove nafatin tais lokál ne’ebé produs husi munisipio sira, no governu tenke iha estratejia di’ak ida hodi bele halo importasaun tais Timor ba merkadu internasional, nune’e komunidade soru tais sira iha vontade nafatin hodi soru tais.
Reportajen : Domingas
Foto : Domingas
