Dili, 31 Maiu 2024 (TVDJ)- Sekretáriada Estadu Igualdade (SEI) hamutuk ho Fokupers realiza diskusaun meza redonda hodi reforsa servisu integradu VBJ, asegura implementasaun komprimisiu jéneru liuhusi alokasaun orsamentu sensível ba jéneru iha ONG 2025, diskusaun ne’e realiza iha Hotél Timor.
Tuir Sekretáriada Estadu Igualdade (SEI), Elvina Sousa Carvalho, hateten objetivu husi enkontru meza redonda ida ne’e hanesan atu halo diskusaun hodi ko’alia kona-ba alokasaun orsamentu ne’ebé sufisiénte ba iha implementasaun planu asaun nasionál violénsia bazeia ba jéneru.
“Objetivu enkontru meza redonda entre (SEI) ho liñas ministériais ka ministériu implementadór planu sosiedade sivíl liuliu Fokupers no hetan apoiu finanseiru husi Uniaun Europeia no liuhusi liñas ministériais sira halo ne’ebé diálogu no diskusaun, ko’alia kona-bá alokasaun orsamentu ne’ebé mak sufisiénte ba iha implementasaun planu asaun nasionál violénsia bazeia ba jéneru.” Dehan Sekretáriada Estadu Igualdade
Nia hatutan tópiku ne’ebé sai importansia liu mak iha diskusaun ida ne’e foku liuba oinsá bele hasa’e investimentu ba iha planu asaun Nasionsál violénsia bazeia ba jéneru iha ONG 2025.
Iha fatin hanesan diretóra ezekutiva Fokupers, Maria Fátima P. Guterres, hatutan liután katak, diskusaun ida ne’e ninia objetivu atu asegura implementasaun VBJ nian atu bele konsidera planu importante sira ne’ebé deskreve ona iha kompremisiu jéneru nune’e bele tau iha planu alokasaun orsamentu sensível ba jéneru.
“Diskusaun ida ne’e realiza tanba oras ne’e daudaun ita tama ona iha siklu orsamentu Jerál Estadu nian, iha siklu planeamentu, diskusaun refere atu ko’alia hamutuk ho liñas ministériais sira ne’ebé sai hanesan autór prinsipál implementasaun VBJ bele konsidera planu importante sira ne’ebé deskreve ona iha kompremisiu jéneru bele aloka orsamentu nian”. Dehan Diretora Fokupers, Maria Fátima P. Guterres
Nia hatutan iha parte segundu, oinsá bele haforsa liutan mekanizmu no kooperasaun entre parseiru, organizasaun implementadór, ministériu relevante sira hodi responde ba asuntu VBJ, ba iha parte sáude, edukasaun, nomós ba iha prosesu re-integrasaun, oinsá bele haree mós ba iha empoderamentu ekonómia Parseiru sira ne’ebé ohin marka prezensa iha meza redonda ida ne’e hanesan Ministériu Saúde, Ministéru Interiór, Sefope no hetan apoiu Uniaun Europeia, worldvision.
“Kazu ne’ebé Fokupers rezistu kona-ba Violénsia Bazeia ba Jéneru mai husi munisípiu, no iha kapitál Dili ne’ebé Fokupers rekolla kona-bá kazu ida ne’ebé ho natureza Violénsia Bazeia ba Jéneru, inklui mós violénsia doméstika, mall trata ne’ebé refere liuba iha violasaun fíziku, iha mós kazu abandona husi parseiru sira”.Dehan nia
Esplika klean liutan katak kazu ne’ebé fokupers rejistu barak liu mai husi munisípiu, Ermera, Likisá, Ainaro, Cova-lima, Maliana, inklui Dili iha tinan ida ne’e fulan Janeiru too Abril, rejistu ona kazu hamutuk neennulu-resin-lima, kazu ne’ebé Fokupers rezista hanesan natureza violénsia bazeia ba jéneru, inklui violénsia doméstika, mall trata refere ba violasaun fíziku, abandona husi kaben no parseiru seluk, violénsia seksuál, abuzu seksuál, inklui kazu insestu.
Reportajen : Adriana/ Albina/ Basilio
Foto: Albina
