Dili, 23 Maiu 2024 (TVDJ)- Kuarta-Feira ne’e Sekretáriu Estadu Asuntu Toponímia no Organizasaun Urbana (SEATOU), realiza atividade hamoos eis merkadu Becora hodi haree espasu públiku ne’ebé vendedór sira okupa husi estrada boot tama ba iha laran nune’e transporte bele halo movimentu livre tama sai.
Sekretáriu Estadu Asuntu Toponímia no Organizasaun Urbana, Germano Santa Brites Dias, hatete ohin halo atividade hamoos iha merkadu Becora atu haree iha espasu públiku oin ne’ebá ne’e sei sobu hotu atu organiza halo di’ak, ateru mós raihenek dalan tama ba merkadu nune’e mós foti kareta aat ne’ebé para iha dalan lori ba ita Tibar.
“Entaun raihenek sira ne’e mai fakar iha ne’e atu halo kaber tiha dalan atu nune’e vendedór sira fa’an sasan iha liur ne’e mai fa’an fali sira nia sasan iha laran, au mesmu tempu ohin ita organiza kareta boot husi Ministeriu Estatal nian atu foti sai kareta at ne’ebé para iha área merkadu laran lori ba hotu iha Tibar inklui sasán aat sira ne’ebé la uza rekolla hotu.”. dehan Sekretáriu Estadu Germano Brites Kuarta ne’e.
Nia hatutan levantamentu ba dadus ne’e halo ona husi ekipa jestaun merkaduria mai foti primeiru ne’e uma-kain hamutuk 78 no dadus segundu ekipa mai foti iha merkadu laran kuaze uma-kain 300 itál, bainhira dadus ne’e tama iha Munisípiu Dili mak sei halo notifikasaun ba komunidade sira ne’ebé hela iha área refere.
“Notifikasaun atu tun ba komunidade sira, bainhira dalan tama tenke kaber ona, Ministeriu Obras Públiku nia dezeñu loos ona no levantame dadus mós loos ona, notifikasaun sei mai iha tinan ida ne’e nia laran, husu ba maluk sira hela iha laran tenke prepara an antes, see mak iha fatin bele book an hodi muda ba nia fatin seluk.” Hatutan Germano
Entretantu SEATOU husu ba komunidade liuliu populasaun iha Dili laran, ne’ebé okupa trotoar no taka baleta, liuliu parte Caicoli, Mascarinhas, Kintal Boot, Kintal Ki’ik, halo favor sobu rasik antes lori makina ba sobu sasán sira estraga no sasán la aproveita. Kuandu ko’alia la rona malu úniku dalan tenke sobu, tanba SEATOU servisu uza lei hodi hadi’a sidade, ema hotu tenke kumpri lei no hakruuk ba lei, tanba dekretu lei ne’e fó dalan atu halo servisu.
Iha fatin hanesan reprezentante komunidade Adino Mascarinhas, hateten governu presiza halo dialogu ho komunidade sira antes hasai sira husi fatin ne’e, komunidade sira koopera ho governu maibé tenke kria kondisaun uluk tanba komunidade sira hela iha merkadu laran.
“Estadu tenke halo dialogu ho komunidade afetadu sira, tanba povu hela iha ne’e sidadaun husi nasaun ne’e nian, ema sempre hatete hotu-hotu koopera ho governu, maibé tenke kria kondisaun no halo dialogu, se la kria diálogu signifika katak estadu ida ne’e nunka konsidera povu nia halerik, bele dehan katak polítika ida la justu ba povu.” Dehan Adinu iha Eis Merkadu Becora
Nia hatutan SEATOU nia ekipa no jestaun merkaduria nia avizu ne’e iha Estrada boot de’it, mais ou menus kria dialogu ruma hodi husu komunidade sira nia ejizénsia saida, nune’e iha karta notifikasaun ruma mak bele koopera ho estadu, Governu ida ne’e mai ho eskavatór dudu sai de’it hanesan fó presaun ba ema nia psikolojia liu-liu ba inan aman no labarik ki’ik nia mentalidade.
Reportájen : Estefánia & Tomás
Foto : Tomás
