Ermera, 09/11/2023 (TVDJ) – Negosiante produtu lokál iha aldeia Kamalpun, suku Lihu, postu adminístrativu Railaku, munisípiu Ermera hetan rendimentu di’ak tanba sira faan produtu besik estrada públiku movimentasaun ema sempre liubá mai.
Armanda Ximenes nu’udar negosiante ida ne’ebé kada loron sempre hala’o nia atividade faan produtu lokál hanesan aifuan ho modo hateten katak se sira faan produtu sira ne’e barak loron ida ema bele sosa to’o $20 ba leten.
“Se modo ho aifuan sira ne’e mak barak entaun to’o lorokraik di’ak ida ema hola to’o $20 lae $25, se uitoan de’it loron ida bele hetan $5 dolar. Tempu aifuan ami faan hanesan rambutan, kulu tasak nomós faan aifarina isin no tahan, fehuk, talas, batar nurak, lakeru okir, pipinu, abakate no seluk tan”, dehan Armanda.
![Produtu lokal ne'ebe negosiante faan iha dalan ninin](https://tvdemocraciajusto.com/wp-content/uploads/2023/11/IMG-20231110-WA0033.jpg)
Nia hatutan, produtu ne’ebé sira faan ne’e balu sira nian rasik no balu sosa tutan fali hafoin lori ba faan. Osan ne’ebé sira hetan hodi selu oan sira nia eskola inklui sustenta nesesidade uma laran nian.
“Ami nian loro-loron la tahan ida ami ba sosa tutan fali depois lori mai ami faan. Aifuan Se sira faan mai ami lima sentavu 50, entaun ami faan fali lima ou neen $.1. Osan ne’ebé ami hetan lori selu oan sira ba eskola, selu ema lere toos kuda kafe oan, hadi’a fali ai oan balu kuda hodi fuan nune’e ami ku hodi faan fali no hola hahan”, tenik Armanda.
Iha tempu hanesa Blandina Castro Soares hateten katak, produtu sira ne’e barak se kuandu iha tempu udan se bailoron hanesan ne’e produtu menus.
Se tempu udan modo no aifaun sira ne’e barak hanesan abukat, modotahan sira ne’e, hudi, aidila, nanas, has, karik tempu rambutan no buah naga ami faan hotu. Nia presu la hanesan haree de’it ba iha sosa ne’e purezemplu hanesan rambutan kuandu ami sosa iha huun haree ba nia folin sae uitoan entaun ita faan fuan neen $1, buah naga sira ne’e folin la hanesan ona tanba ne’e ami sosa entaun ami biasa faan ne $2.50 fuan ida, aifuan ne’ebé ami faan ne sosa hotu mak faan fali”, informa Blandina.
Blandina mós husu ba feto maluk hotu-hotu iha Timor-Leste atu labele moe hodi hala’o atividade negósiu saida de’it, importante bele hetan osan hodi sustenta aan rasik no ba família.
“Ha’u nia mensajen ba feto maluk sira hotu atu keta tauk no lakon vontade kona-ba iha negosiante nian, negósiu parte ida di’ak no parte ida la di’ak, no loro-loron ita sempre hasoru dezafiu no todan tebes. Maibé, keta lakon vontade tanba knaar ita nian mak ne’e ona. Hanesan feto karik servisu seluk ba ita laiha ona hakarak ka lakoi ita tenke buka moris ho negósiu atu hetan barak ka uitoan nafatin agradese”, Blandina apela.
Entretantu negosiante sira iha suku Lihu mós husu ba komunidade liu-liu ba ukun-na’in sira bainhira liuhusi dalan públiku ba munisípiu hodi sosa sira-nia produtu, nune’e bele promove produtu lokál no sira hetan netik rendimentu uitoan hodi sustenta nesesidade família nian.
Reportajen: Jacinto A. Soares
Editór: Ekipa TVDJ