Dili, 14/09/2023 (TVDJ)- Ministra Edukasaun (ME) Dulce de Jesus Soares, hamutuk ho dirijente foun sira, oinsá prepara planeamentu anuál ba programa IX Governu konstituisionál ba tinan lima (5), sei tau prioridade ba eskola ensinu tolu mak hanesan Edukasaun Pre-eskolar, Ensinu bazíku, Ensinu Sekundáriu Jeral no Ensinu Tekníka Vokasionál.
Tuir Ministra Edukasaun (ME) Dulce de Jesus Soares hateten, planu anuál ba programa IX governu atu implementa, iha tinan lima nia laran hodi tau prioridade ba sistema edukasaun iha territoriu laran.
“Programa IX governu konstituisionál ba tinan lima (5), hodi deskute mós programa tolu mak importante hanesan, Edukasaun Pre-eskolar, Ensinu bazíku, Ensinu Sekundariu Jeral. Iha parte rua, Ensinu Tekníka Vokasionál, hodi haree ba sistema nivel ensinu formasaun dos profesores, materiasis didátikus, kuríkulu, avaliasaun. Tanba formasaun dos profesores ita ko’alia kona-ba kualidade edukasaun,” dehan Ministra Edukasaun Dulce de Jesus Soares, iha salaun Delta Nova.
Ministra Edukasaun neʼe esplika katak, bainhira ita ko’alia kona-ba kualidade edukasaun maka profesores ne’e sai hanesan parte ida importante tebes ne’ebé mak iha ligasaun ho asuntu Ministériu Edukasaun nian, entaun iha planu ne’e prepara ba planu orsamentu jeral de estadu 2024.
Iha reuniaun planeamentu anuál ba programa IX governu konstituisional ba tinan 2024 ne’e hetan partisipasaun husi Ministra Eduksaun no dirijente Ministeriu Edukasaun nian.
(Reportajen Tomas dos Santos)
Editor: Salus Carvalho
