Dili-16/10/2023 (TVDJ) Ministra Edukasaun Dulce de Jesus Soares hala’o vizita hodi observa direta ezame nasionál ba eskola tolu iha kapitál Dili, mak hanesan eskola 30 de agosto, Eskola Sekundariu Jerál 10 de Dezembro no Eskola Sekundariu Jerál 5 de Maio iha vizita ne’e ministra haree direta ba estudante sira ne’ebé hala’o hela sira nia ezame nasionál tinan ida ne’e.
Tuir Ministra Edukasaun Dulce de Jesus Soares hateten objetivu hosi vizita ne’e atu haree no observa direta prosesu ezame nasionál ba estudante no haree mós kondisaun eskola nian.
“ohin ha’u vizita ba eskola tolu ha’u haree katak prosesu ne’e la’o ho di’ak tebtebes iha eskola ida mak ninia aranje iha sala laran ne’e ladun kapas tanba númeru estudante ne’ebé as liu, no estudante na’in rua tur hamutuk iha kartera ida, tanba ne’e ladun iha avontade di’ak ba sira hodi tuir ezame nasionál ida ne’e, maibé em jerál ezame la’o ho di’ak”, dehan Ministra Edukasaun Dulce de Jesus Soares.
Nia akresenta ami nafatin halo monitorizsaun ba eskola sira hotu iha teritóriu laran tomak espera katak estudante sira bele hala’o ezame ho susesu.
Iha fatin hanesan Diretor Eskola Sekundariu Jerál 10 de Dezembro Martino Cursin hateten sira senti kontenti tanba Ministra Edukasaun pela primeira vez mai vizita hodi haree direta ba estudante sira ne’ebé hala’o ezame nasionál nomós bele haree direta sira nia difikuldade ne’ebé sira infrenta.
“ami hanesan orgullu boot ida tanba foin primeira vez ezame nasionál la’o ne’e Ministra Edukasaun bele to’o mai iha ami nia eskola, tanba eskola ne’e hahú loke iha 2002 ate agora foin primeira vez ministra mai vizita iha ezame nasionál hanesan ne’e”, dehan Diretór Eskola.
Relasiona ho ezame nasionál iha Eskola Sekundáriu jerál 10 de Dezembro estudante ne’ebé tuir ezame hamutuk 736 no husi númeru ne’e na’in sanulu mak aujenti no ida mak la mai ezame maibé motivu husi ne’e diretor eskola seidauk hatene.
Iha sorin seluk Diretor Eskola Sekundariu Jerál informa sira sente kontenti no orgullu tanba bele hetan vizita husi Ministra Edukasaun hodi haree no obserba direta ba estudante sira ne’ebé hala’o hela sira nia ezame nasionál.
Husi vizita ne’e mós Ministra Edukasaun Dulce de Jesus Soares haree no observa direta ba kondisaun eskola sala de aula nomós rona preokupasaun profesor sira nian kona-ba estudante sira ne’ebé hala’o ezame nasionál.
Reportajen : Domingos Amarál
Editór: Ekipa TVDJ
