Dili, (TVDJ)- Prezidente Komisaun Reguladora Arte Marsiais (KRAM) Octavio da Conceição hateten IX Governu konstituisionál liuhusi Ministeriu Desporto Arte no Kultura mai ho politika hodi kontinua fó apoiu hodi dezenvolve Organizasaun Arte Marsiais (OAM) iha Timor-Leste, Tanba ne’e husi dezenvolvimentu kompetisaun sira, formasaun ba arte rua involve mós lider organizasaun sira ba rezolusaun konflitu sira no promove Dili sai hanesan fatin seguru ba komunidade.
“ Ita halo dialogu para hametin unidade nasional hodi prepara ita nia asaun sira, iha mós ita nia responsabilidade organizasaun sira hanesan arte marsiais, lei nú 5/2017 ne’ebé fó kompetensia ba komisaun regulador arte marsiais mai ho vizaun katak organizasaun arte marsiais organizado no responsavel, misaun dezenvolve arte marsiais no rituais tuir politika programa governu ne’ebé estebelesidu,” dehan Prezidente KRAM iha loron quarta 18/10/23 iha Aimutin.
Nia hatutan, husu ba lider organizasaun hotu atu kumpri didia’ak regulamentu hirak ne’e nune’e bele kria paz no estabilidade iha bairo no iha asaun RDTL, tanba dalabarak arte marsiais no rituais mak la iha atetude no iresponsabilidade ne’ebé la kontrola membru sira la fó formasaun ne’ebé di’ak, tanba ne’e tenki dezenvolve didi’ak hodi kontribui ba dezenvolvimentu nasional.
Iha fatin hanesan komandante eskuadra PNTL Dom Aleixo Inspetór Alexandrino da Costa (Samurai) hateten, polisia atu asegura no fó seguransa ba komunidade sira, tanba ne’e husu ba arte marsiais no arte rituais tenki disiplina no respeita malu nafatin hanesan ema Timoroan.
“Arte marsiais no arte rituais nia seidauk iha familia ne’e iha uluk ona tanba ne’e ita labele oin buis ba malu, arte marsiais hanesan talentu no hanesan desportu ida para lori ita atu ba sai ema ne’ebé saudabel iha desportu ne’e nian, arte rituais hanesan identidade kultura ninian tanba ne’e tenki respeitu malu”. Informa Inspetor
Entretantu reprezentante arte marsiais no arte rituais Jaime da Cruz hateten, arte marsiais no rituais nia dutrina ne’e di’ak hotu eduka ema atu sai ema, maibé ema barak liu entaun iha balu rona no balu la rona.
“arte marsiais no arte rituais ne’e ninia dutrina ne’e di’ak hotu hanorin ema atu sai ema, komu ema ne’e barak liu entaun balu rona halo tuir no balu la rona hodi halo tuir sira nia hakarak de’it”. Dehan reprezentante arte marsiais no rituis iha aimutin
Nia hatutan husu ba maun alin treinador sira ne’ebé fó treinu atu eduka sira katak dutrina arte marsiais no rituais hanorin ema atu hadomi ema hotu hanesan maun alin rasik.
Iha okaziaun ne’e hetan partisipasaun husi Komisaun Reguladora Arte Marsiais (KRAM) hamutuk ho Polisia Nasional Timor-Leste (PNTL) Komando Munisipio Dili, Komando Eskuadra Dom Alexo, Auturidade Lokal sira iha Postu Dom Aleixo, komunidade, arte marsiais Persaudaran Setia Hati Terate (PSHT), Ikatang Keluarga Silat Putra Timor-Leste (IKS-PTL), Korka, Pajajaran no arte rituais Sete-sete.
Reportajen Domingos Amarál
Editór : Salus Carvalho
