Dili-16/10/2023 (TVDJ). Xefe Suku Kampung Alor, Alsina Carvalho dos Santos deside rekandidata ba xefe suku periodu 2023 to’o 2030 tanba komunidade iha suku Kampung Alor maiória fó apoiu másimu ba nia atu kontinua mandatu tinan lima tan hodi dezenvolve suku refere.
Xefe Suku Alsina hateten katak ho nia servisu ne’ebé mak durante mandatu tinan hitu konsege halo iha suku kampung alor, halo komunidade iha suku refere barak mak kontinua fó apoiu ba nia atu rekandidata fila-fali nune’e bele lidera tan dala ida ba periodu 2023 to’o 2030.
“Ha’u rekandidata ne’e tanba sei iha ema lubuk ida mak sei apoiu nafatin ha’u, durante tinan hitu sira mós haree saida mak ha’u halo, mezmu kada vez ita ema la perfeitu balu mak ita la halo, maibé buat lubuk ida mak ita halo. Tanba bainhira akontese problema ha’u nunka husik hela, problema atu mosu kalan atu mosu loron, hanesan iha inundasaun dia 4 abril 2020, ha’u direta ba kedas komunidade sira nia fatin para atu apoiu seguransa no buka fatin ne’ebé mak mahon para sira bele hela ba, ida ne’e mak durante ne’e komunidade sira haree”, dehan Xefe Suku Alsina, iha nia knaar fatin Kampung Alor, Dili.
Nia hatutan karik iha eleisaun ne’ebé sei realiza iha loron 28 fulan Outubru tinan 2023 ne’e, nia kontinua hetan fiar hosi komunidade sira, prioridade dahuluk ne’ebé nia sei halo mak kria paz no estabilidade iha suku laran, prioridade daruak mak sei kontinua dezenvolve suku, liu-liu servisu iha suku kmupung alor ne’ebé mak seidauk finaliza nia sei kontinua tau prioridade liután.
“Karik ha’u eleitu, estabilidade ne’e mak ha’u kria uluk, tanba hau lakoi suku kiikoan ida tenke iha problema entre joven sira ne ita lakoi atu akontese, ida ne’e ita hakarak suku ida ho aldeia tolu de’it ema mós labarak ita tenke moris iha armónia nia laran, labele iha tan konfrontasaun iha futuru”, dehan Alsina
Maske nune’e Alsina hateten katak, se nia la eleitu, hanesan Timoroan nia prontu koopera ho ida ne’ebé mak eleitu hodi servisu hamutuk atu kontinua dezenvolve suku Kampung Alor iha futuru. Enkuantu kandidatu xefe suku Kampung Alor periodu 2023-2030 hamutuk na’in haat kompostu husi, Alsina Carvalho dos Santos, Virgilio Marques, Edmundo de Sá no Estela Aleixo.
Reportajen : Jacinto Amaral Soares
Editór: Salus Carvalho
