Covalima,15/09/2023 (TVDJ)- kondisaun eskola bazika filial Halic at difikulta estudante sira nia prosesu aprendizajen iha tempu udan, tanba estudante sira labele halaʼo prosesu aprendizajen hanesan babain.
Kordenador eskola bazika filial Halic Cirilo F. C. Amaral hateten,eskola kondisaun agora dadaun at ona bainhira iha tempu udan estudante sira labele halaʼo sira nia prosesu aprendizajen tanba kondisaun eskola la diʼak no bele fó risku ba sira nia vida.
“Ami nia kondisaun eskola agora dadauk at ona fó mós risku ba ami nia vida bainhira iha tempu udan no anin ami sei la tama eskola, ho kondisaun eskola ne’ebé at estudante sira hosi 3 ano no 6 ano ami akumula hamutuk deit iha sala ida hodi halaʼo prosesu aprendizajen,” dehan Cirilo F. C. Amaral.
Kordenador EBF Halic husu ba parte relevante liu-liu ministériu edukasaun atu koresponde lalais ba sira nia eskola ne’ebé agora daudaun at ona, tanba bainhira iha tempu udan prosesu aprendizajen paradu.
“Ha’u husu ba nai ulun sira ne’ebé iha kompetensia boot ba edukasaun ka konstrui eskola ida ne’e ami husu ita boot sira iha tempu badak nia laran bele mai haree ami nia eskola EBF Halic,ˮ dehan Kordenador EBF Halic.
Aleinde profesor Armindo Bareto preokupa mós kona-bá kondisaun eskola ne’ebé at no sala de aula 1 akumula estudante husi 3 ano no 6 ano hamutuk iha sala ida, tanba ne’e nia husu ba parte relevante atu tau atensaun ba sira nia eskola.
“Ami nia eskola filial Halic ida ne’e kondisaun at bele fó risku ba ami no estudante sira, ami nia eskola ne’e mós sala ida akumula klase rua hamutuk deʼit,” dehan profesor Armindo.
Iha fatin hanesan estudante Frederito Nahason Maia, 6 ano preokupa ho sira nia kondisaun eskola ne’ebé agora dadun at ai-rin uma nia at no atu kotu hotu ona tanba ne’e sira senti la seguru bainhira hala’o sira nia prosesu aprendizajen.
“Ami husu ba ministéiru edukasaun atu hadia ami nia eskola tanba ami nia eskola at hotu ona ami senti tauk bainhira iha tempu anin hanesan ne’e,” dehan estudante Frederito.
Estudante ne’e akresenta tan sira nia eskola kondisaun janela mós at, nune’e fasil ba ema atu foti livru ne’ebé tau hela iha eskola laran, tanba ne’e nia husu ba parte relevante atu hadia lalais sira nia eskola refere.
Tuir observasaun Jornalista iha terenu ba eskola EBF Halic, nia kondisaun at bele fó ameasa ba estudante no profesor/a sira nia vida. Bainhira iha tempu anin no udan tanba eskola refere nia ai-rin atu kotu no didin deʼit bebak atu dodok ona.
Reportajen: Domingos Amaral
Editor: Salus Carvalho
