Dili, 19-02-2024, (TVDJ)-Tuir Bilal Aurang Zeb Durrani Reprezentante UNICEF ba Timor-Leste dehan iha okaziaun lansamentu projetu apoiu emerjénsia ba labarik sira hodi hatan ba inundasaun no Covid-19, no projetu ne’e hetan fundus husi Republika Popular Xina (RPX) hodi apoiu povu Timor-Leste.
Tuir índise vulnerabilidade ND-GAIN nian, medida globál ida kona-ba vulnerabilidade nasaun ida ne’e nian ba perturbasaun klimátika, Timor-Leste klasifika 111 husi nasaun 181, signifika katak ita-nia vulnerabilidade ba epidémiku klimátiku aas, maibé ita-nia disponibilidade atu hatan sei ki’ik tebes.
“Tinan tolu liubá, ami haree oinsá inundasaun maka’as bele fó todan adisionál ba familia sira ne’ebé marjinalizadu ona, no halo lakon ema na’in 42, inundasaun iha tinan 2021 hamosu prejuizu ba seguransa Bee Moos, Eskola, Saúde no Nutrisaun ba familia nian liuliu inan no bebé sira. Inundasaun iha Dili rezulta ema na’in 13,554 mak dezlokadu iha rai-laran tanba sira-nia uma hetan estraga no la asesivel”. Dehan Bilal Aurang Zeb Durrani Reprezentante UNICEF ba Timor-Leste iha Sala konferénsia Istorika Kofi Anan.
Aleinde ne’e mós tinan tolu liu tiha, ita hatene katak moris seidauk fila fali ba normalidade ba familia sira ne’ebé afetadu, no ita mós hatene familia sira-ne’e kontinua moris iha área sira ne’ebé iha dezastre, akontesimentu inundasaun iha futuru bele aumenta sira-nia vulnerabilidade atuál.
“Nu’udar UNICEF ami nia servisu foka liu ba prestasaun servisu no fornesimentu atu proteje labarik no sira-nia familia husi impaktu maka’as husi inundasaun. Tanba ne’e ami agradese ba Governu Republika Popular Xina, ne’ebé lidera husi Embaixadora Wenli, hodi fó apoiu ba iha área tolu ne’ebé importante hanesan Nutrisaun, Bee, Saneamentu no Edukasaun”. Dehan Bilal Aurang Zeb Durrani Reprezentante UNICEF ba Timor-Leste iha Sala konferénsia Istorika Kofi Anan
Durante periodu fulan 18 nia laran, projetu ida-ne’e sei kompleta servisu ne’ebé Governu Timor-Leste hala’o hodi responde lalais ba nesesidade imediata sira ne’ebé rezulta husi akontesimentu inundasaun nian. Unicef servisu hamutuk ho Ministériu Saúde, Ministériu Edukasaun no Ministériu Obras Publikas, ho projetu ida ne’e mós sei hametin sistema no koñesimentu bazeia ba komunidade, aleinde ne’e bele minimiza risku inundasaun ba komunidade.
Iha fatin hanesan reprezentante Embaixadora Xineza iha Timor-Leste Wang Wenli hateten liuhusi projetu Asisténsia Emerjensia ba labarik sira hodi hatan ba inundasaun no Covid-19 iha Timor-Leste, ema na’in 146,000 ne’ebé afetadu husi inundasaun sei asesu ba kualidade Nutrisaun, Edukasaun, Bee no Saneamentu, ne’ebé sei ajuda atu rekupera husi estragus ne’ebé kauza husi inundasaun.
“Ami Governu Xina No Fundu Nasoins Unidas Ba Labarik (UNICEF) lansa ona projetu ida ho valór millaun $ 1.5 hodi kompleta apoiu Governu Timor-Leste nian ba komunidade sira ne’ebé hetan impaktu husi inundasaun”. Dehan Embaixadora Xineza Iha Timor-Leste Wang Wenli iha sala konferénsia Istorika Kofi Anan
Governu Xina kontinua fó apoiu ba dezenvolvimentu Timor-Leste nian, hodi envolve tan kooperasaun entre Xineza ho Timor-Leste iha área Infraestrutura, Saúde, Agrikultura no Edukasaun. Projetu apoiu emerjénsia ne’ebé implementa hamutuk ho edifísiu UNICEF nian iha Timor-Leste no projetu ne’e sei hetan benifisiu ba labarik no feto hamutuk 150,000, ho objetivu atu fó asisténsia tanjivél ba sira-nia moris no edukasaun. Governu Xina hein katak liuhusi projetu ida-ne’e ema sira iha Timor- Leste bele simu apoiu no enkorajamentu husi nasaun amigavél sira hanesan Xina.
Reportajén: Siga
Foto : Gabriela
