Dili-30/10/2023 (TVDJ) Ministra Edukasaun hala’o enkontru ho Embaixador Cuba Iha Timor-Leste hodi diskuti kona-ba koperasaun entre Ministeriu Edukasaun Cuba ho Ministeriu Edukasaun Timor-Leste iha área edukasaun.
“Ohin enkontru kortezia ho embaxadora Cuba iha Timor-Leste ami ko’alia kona-ba iha área edukasaun no hakarak reativa fila-fali akordu sira ne’ebé uluk Governu Cuba ajuda ona ita barak tebtebes iha área edukasaun liu-liu iha alfabetizasaun, tanba programa sira ne’e to’o ohin loron la kontinua.” Informa Ministra Edukasaun Dulce de Jesus Soares.
Ministra ne’e hatutan ohin simu mós karta ida husi Ministra Edukasaun Cuba ne’ebé reintrega, hakarak hahu fila-fali koperasaun ho governu Timor-Leste iha área edukasaun ba maluk sira ho nesesidade espesial.
“Tanba oras ne’e daudaun ita nia formasaun ekivalensia foin to’o iha Ensinu baziku seidauk iha ensinu sekundariu, entaun iha posibilidade Cuba bele apoiu Ministeriu Edukasaun dezenvolve programa ekivalensia ba ensinu sekundariu ba povu Timoroan sira ne’ebé iha área espesial.” Informa ministra edukasaun.
Ministra ne’e akresenta iha mós programa importante ida Ministeriu Edukasau sei halo diskusaun ho Universidade Nasional Timor-Leste atu haree se karik presiza apoiu ruma iha liangua Español antes sira tama ba iha Faculdade Medisina UNTL, nune’e iha posibilidade bele hahu fila-fali koperasaun sira ne’e.
Iha okaziaun ne’e embaixadora Cuba Grisel Alina Innis hateten ohin mai hasoru malu ho ministra edukasaun hodi halo diskusaun no análiza kona-ba projetu kontinuidade ba programa edukasaun iha Timor-Leste.
“ohin mai hasoru malu ho ministra edukasaun hodi diskuti no análiza hodi halo kontinuidade ba programa edukasaun iha área espesial ne’ebé iha tempu anterior Governo Cuba halo ona koperasaun ho Governo Timor-Leste,” dehan embaixadora Cuba.
Reportajen : Domingos Amaral
Editór : Salus Carvalho
