Dili, 02 Jullu 2024 (Media Democracia)-Madalena Soares de Oliveira ho idade 32 husi Munisípiu Viqueque Postu-Administrativu Ossu, daudaun ne’e hela iha Suku Bairo-Pite Aldeia 5 de Outubru, loro-loron sempre halo atividade negosiu ki’ik iha dalan ninin bele hetan osan hodi responde ba nesesidade uma laran.
Tuir negosiante ambulante, Madalena Soares de Oliveira, hateten daudaun ne’e halo atividade negósiu ki’ik iha dalan ninin nune’e bele hetan osan hodi sustenta ba nesesidade loro-loron nian, hodi suporta mós alin sira iha nível estudu.
“Objetivu husi fa’an sasan hanesan Minarai, Sigaru, Pulsa inklui Pop-Ice, ida ne’e atu responde ba nesesidade uma laran nian. Aleinde ne’e suporta mós alin sira nia eskola bainhira sira presiza, tanba sasan ne’ebé ha’u fa’an kada loron hetan $10 too $15 dollar, maibé haree mós ba situasaun hanesan iha tempu udan dalaruma sasan folin la too de’it $5 dolar tanba situasaun udan nomos ema barak halo atividade negosiu ki’ik iha trotoar leten tanba nesesidade obriga”. Dehan Madalena
Nia hatutan bainhira atu ba fa’an sasan iha tempu dadersan tenke ajuda uluk nia bin boot hodi halo servisu uma laran nian hotu, hafoin oras 9.00 otl liu mak foin bele ba fa’an sasan maibé antes dadersan nia alin sira lori ona ba iha fatin negosiu nian.
“Osan ne’ebé lori halo atividade negósiu ki’ik ne’e hetan suporta no apoiu liuhusi maun ho bin sira nia ajuda inklui tama mós iha grupu Moris Rasik (MR) osan ne’ebé ha’u kreditu ho total $300 dolar Amerikanu ne’ebé kada semana tenke setór ho osan $13.05, tanba ne’e tenke esforsu aan hodi buka nafatin osan nune’e bele setór.” Dehan nia
Atu esplika kle’an liután katak durante Madalena hala’o nia atividade negosiu loro-loron iha iha dalan ninin, maske ema barak halo negosiu maibé ida ne’e la sai problema ba nia tanba liuhusi ida-idak nia badinas mak bele hetan osan, maske osan ne’ebé nia hetan ladun boot maibé agradese no esforsu nafatin, loron ruma sei susesu.
Reportajen : Nelfiano Soares
Foto : Nelfiano
