Dili, 21/09/2023 (TVDJ)- Centro Nacionál Chega (CNC) hamutuk ho Sekretáriu Estadu Arte no Kultura (SEAK) hala’o enkontru koordenasaun ho organizasaun resisténsia no organizasaun sosiedade sivíl atu halibur hanoin kona-bá ho festival fronteira 2023 ho tema “Interkambiu Kulturál ba Promove Rekonsiliasaun”, atividade ne’e sei realiza fulan novembru iha tinan ne’e.
Tuir Sekretáriu Estadu Arte no Kultura (SEAK) Jorge Soares Cristivão hateten, konsultasaun organizasaun resisténsia sira ba atividade festival interkambiu kultural ba promove rekonsiliasaun ne’ebe mak inisiativa husi SEAK no CNC.
“Enkontru ne’e sei halo aprezentasaun no fó ideia husi organizasaun resisténsia no Sosiedade Sivíl sira kona-ba atividade refere hodi ko’alia kona-ba interkambiu cultural ba promove rekonsiliasaun,” dehan SEAK iha Centro Nacionál Chega Balide.
Nia esplika atividade interkambiu refere hanesan rekomendasaun husi relatoriu Comição de Acolhimento, Verdade e Reconciliação (CAVR) no KKP ne’ebé presiza iha futuru atu promove kultura sai dalan ida ba rekonsiliasaun ne’e mak agora dadauk SEAK ho CNC hahú hala’o atividade sira ne’e, atividade ne’e sei hetan partisipasaun husi komunidade Nusa Tenggara Timur (NTT), liu-liu komunidade iha área Belu, Kefa no Malaka ne’ebe mak iha fronteira direita ho Timor-Leste.”
Iha fatin hanesan Director Ezekutivu Centro Nasionál Chega (CNC) Hugo Maria Fernandes hatutan, festivál ne’e iha modalidade haat (4), kontestu boot rua mak ida kona-ba kultura nian no ida seluk kona-ba rekonsiliasaun nune’e iha inisiativa ne’e sei iha mós semiáriu kona-ba kultura no memoria pasadu nian.
“Iha eventu ne’e péritu sira sei mai husi parte Indonésia nia no Timor nian, no iha kalan sei iha mós aprezentasaun dansa kultura husi parte NTT nomós husi Timor nian hodi realiza animasaun noite Cultural iha mós jogu amizade entre joven husi Timor no NTT, sei lala’o mós vizita ba fatin históriku nian ne’ebé atividade refere sei hala’o durante loron tolu nia laran iha fronteira Timor-Leste nian,” dehan Director Ezekutivu Centro Nasionál Chega (CNC).
Nia haktuir SEAK no CNC sei kontinua hala’o atividade ida ne’e nu’udar eventu festival tinan- tinan, nune’e sei halo konsulta ho Organizasaun Rezisténsia no sosiedade sivíl sira hodi halo enkontru ho Liñas Ministeriais sira ne’ebé mak sei partisipa oha eventu refere.
Seremonia ba atividade ne’e hetan partisipasaun husi, Centro Nacionál Chega (CNC), Sekretariu Estadu Arte no Kultura (SEAK) Organizasaun Rezistensia, Sosiedade Civil, no Prezidente CNJTL.
Reportajen :Estefánia Cardoso
Editór: Salus Carvalho
