Dili, 26 Juñu 2024, (Média Democracia) Centro Nasional Chega (CNC) hamutuk ho ho Vise-Ministru Administrasaun Estatal (MAE) entrga uma memoria esperansa ba sobrevivente na’in rua iha aldeia Au-hun suco Becora Postu-administrativu Cristu-Rei Municipiu Dili. Kuarta-Feira ne’e.
Iha diskursu Diretor ezekutivu Centro Nacional Chega.IP (CNC) Hugo Maria Fernandes, hateten katak CNC servisu hamutuk ho autoridade hodi identifika sobreviventes sira, no dadaun ne’e CNC halo ona uma hamutuk sanulu-resin-ualu (18) iha Teritoriu Timor-leste inklui husi uma tolu ne’ebé mak foin entrega iha semana ne’e.
“CNC servisu ida ne’e halo parseria ho nai autoridade lokal suco no aldeia ho komunidade sira hodi harii uma ba sobreviventes sira, dadaun ne’e ita halo uma tolu mak hanesan ita halo iha rua (2) iha Au-hun no ida (1) iha aisirimou, no uma tolu refere kompleta ba uma sanulu-resin-ualu(18) ne’ebé mak CNC halo iha teritoriu Timor-Leste, programa ida hanaran medida reparativu ba sobrevivente sira, oinsa mak estadu hatudu ninia responsabilidade ba ita nia vitima sira husi komflitu ida.” Dehan Diretor ezekutivu Centro Nacional Chega.IP
Nia mós hatutan katak loron 26 de junhu hanesan loron internasional kontra tortura hanesan loron nasional ba apoiu ba vitima husi tortura iha mundu tomak. Maske CNC seidauk halo buat boot ida ba sobreviventes maibé neneik ba bebeik estadu sei hatudu duni ninia responsabilidade hanesan halo uma, tratamentu saude no fo bolsa estudu ba oan sira.
Iha fatin hanesan Vise-Ministru Administrasaun Estatal hateten katak sobreviventes sira ne’ebé sakrifika-aan iha situasaun difisil nia laran governu iha morál responsabilidade ba sira nune’e agradese ba diretor ezekutivu CNC ho ekipa ne’ebé kria programa hirak ne’e hodi salva sobre viventes sira iha tempu difisil.
“imi sakrifika imi nia situasaun ba rai doben ida ne’e nune’e estadu iha dever ba responsabilidade hirak ne’e, nune’e agradese ba diretor ezekutivu CNC ho ninia ekipa ne’ebé iha hanoin di’ak hodi bele fasilita ita nia sobrevivente sira, nune’e tenke kontinua ba oin, tanba sobrevivente barak mak ita sedauk identifika. Dadun ne’e MAE estende ninia meus atendimentu too iha baze hodi rekrutamentu funsionariu hodi apoiu husi suco mai postu no municipiu hodi bele tulun ita hodi identifika ita nia maluk sobreviventes.” Dehan vise Ministru MAE
Aleinde ne’e Pedro hanesan sobreviventes no benefisiariu ba uma ne’ebé harii husi Centru Nacional Chega (CNC.IP) afirma katak sente orgullu bainhira governu iha hanoin ne’ebé di’ak hodi harii netik uma ba nia ho kaben
“Hau sente kontente bainhira CNC ho hanoin ida ne’ebé di’ak hodi harii uma di’ak ba ha’u ho ha’u nia kaben, tanba desde ukun-aan ha’u ho ha’u nia kaben hela de’t iha uma aat nia okos, bainhira udan boot ami sempre terus husi udan-been ne’ebé tama de’it mai ami nia uma laran tanba uma nia kakuluk kuak hela, no la iha osan atu hadia, ne’e duni ha’u husu agradese no obrigado ba governu nia apoiu.” Dehan Sobrevivente Pedro
Atu esklarese de’it katak durante iha funu nia laran sira oferese sira nia-aan no sakrefika sira nia-aan ba rai ida ne’e, tan de’it hakarak Timor-Leste ukun rasik-aan, ne’e duni liuhusi sakrefisiu ne’ebé sira halo ona iha tempo difisil nia laran maka ohin loron governu iha hanoin di’ak ida hodi harii uma ba sobrevivente.
Reportajen : Basilio
Foto : Basilio
