26 de Junho 2024 (Media Democracia)-Estudante unversitariu ne’ebé durante ne’e asessu ba bolsa hakbiit realiza konferénsia perss relasiona ho politika IX governu nian ne’ebé atu muda bolsa hakbiik ba iha bolsa Parsial, atividade konferénsia perss refere realiza iha Jardim 5 de Maio Colmera Dili.
Iha konferénsia perss ne’ebé lidera husi estudante, Reni Gonçalve husi, Institutu Superior Cristal (ISC), Nelson da Silva husi UNTL no Jose da Costa husi Universidade Católica Timorense (UCT), haktuir katak edukasaun hanesan direitu basiku ba sidadaun hotu, estudante ne’ebé inan-aman laiha kbiit atu tulun nune’e liuhusi programa VIII governu hodi atribui bolsa hakbiit ba estuante no tulun sira hodi asessu ba ensinu superior iha Timor Leste. Nune’e estudante hirak ne’e la konkorda ho programa IX governu nian ne’ebé atu muda hikas bolsa hakbiit ba bolsa parsial tamba prejudika ba nesesidade estudante sira nian.
“infelzmente ho politika IX governu nian ne’ebé lidera husi sua exelensia Kay-Rala Xanana Gusmão ho baze diploma ministerial no.11/2024 de 7 de Fevreiru, deside muda bolsa Hakbiit ba fali bolsa Parsial. Desizaun ida ne’e tuir ami injustisa tebtebes no sei la tulun ami kbiit-laek nia oan sira atu bele asessu ba ensinu superior iha Timor-Leste. tamba ne’e muda bolsa hakbiit ba bolsa parsial laos de’it difikulta estudante husi ami kbiit-laek nia oan sira atu aprende ho di’ak maibé iha konsekuensia seluk mak lori ami kbiit-laek nia oan sira hotu tama iha rai-kuak, ho nune’e ami estudante bolsa hakbiit iha Ttimor laran total mente la konkorda no sei la asina ba karta kontratu foun mundu ba bolsa parsial ne’ebé FDCH atribui ona ba kada Universidade ho data ne’ebé determinadu. Hatutan Portavoz
Porta voz ne’e mos afirma klean liután katak governu laiha razaun forte atu muda bolsa hakbiit ba bolsa parsial, nune’e sira la konkorda no la asina ba karta ne’ebé aloka ona ba iha unversidade hotu hodi muda bolsa refere ba bolsa parsial. Relasiona ho informasaun balun katak estudante ne’ebé asessu ba bolsa hakbiit la aproveita ho di’ak, tanba governu laiha dadus konkreta kona-ba informasaun refere
Iha sorin seluk bolseira Angelita Saldanha deklara katak, hanesan estudante ativu iha institutu profisionál de Canossa, no agora livre ona teoria, hein ba estajiu de’it. Durante ne’e hala’o estudo depende ba iha bolsa hakbi’it iha oitavu-governo nian no program refere la’o di’ak tebes, maibé governu foun halo mudansa sistema bolsa hakbi’it ne’e ba fali bolsa parserial signifika katak governu selu deit mak propinas nian maibé nesesidade seluk taka ona.
“Ha’u hanesan estudante triste tebes ho mandatu husi governu foun ne’ebé deside atu taka sistema bolsa hakbi’it, ha’u la konkorda ho razaun hanesan ema kbiit-laek nia oan, hanesan oan ki’ak ne’ebé hala’o estudo durante ne’e depende ba bolsa hakbi’it maibé governu dehan taka entaun la iha ona esperansa atu kontinua eskola tanba ema atu selu la iha no iha familia ha’u mesak mak eskola tanba ha’u nia Pai mate ona no Mae mak sei moris maibé moris ho kondisaun difisensia fiziku hela iha viqueque no ha’u mesak mak iha Dili hodi eskola.” Dehan Angelita Saldanha
Nia salienta liután katak, governu atu mantein nafatin bolsa ne’e tanba programa ne’e hahu husi programa daualu nia durante bolsa kbiit-laek, tanba kaundo governu taka bolsa kbiit-laek mak problema ne’ebé mosu hanesan osan selu kost la iha no osan ne’ebé atu hatama ba estajio mós la iha, entaun bele hamate sira nia estudu
Hatutan husi Luciana Marques Mendes hanesan estudante ativu iha Universidade De Dili (UNDIL) kolega ne’ebé ajuda Angelita Saldanha hateten, sira nain rua hanesan estudante hotu no husik inan Aman iha foho hodi mai Dili atu eskola, tanba hetan bolsa kbiit laek ne’e, nune’e husu ba nonu-governu katak favor ida labele halo mudansa ba bolsa kbiit-laek, tanba sira nia eskola no nesesidade lorloron depedensia ba bolsa kbiit-laek
“Hanesan estudante ha’u mós hasoru hotu problema hanesan fatin ne’ebé ha’u hela ba durante fulan ne’e (6) ona seidauk selu, tanba osan la iha, ne’e duni favor boot ida ba nonu-governu labele halo mudansa ba bolsa kbiit-laek nian, tanba ami nia eskola no nesesidade lorloron bazea ba osan husi bolsa kbiit-laek.” Dehan Luciana
Nia hatutan tan katak, loron-loron kost na’in sempre sisi tanba kost seidauk selu durante fulan neen (6) Nia laran, entaun sira sempre koalia ba kost nain atu bele hein oituan lai, tanba agora sira seidauk iha osan
Reportajen : Basilio&Domingas
Foto : Domingas
