Dili, 04/03/2024, (TVDJ)-Autoridade Protesaun Civil (APC) Atualiza rezultadu akontesimentu dezastre naturais ne’ebé akontese iha Fulan Fevereiru 27 to 4 Marsu iha tinan 2024 ne’ebé komunidade sira afeita iha semana ida nia laran hamutuk xefe familia sanulu resin-sia (19), atualizasaun ne’e realiza iha APC Kaikoli.
Tuir Xefe Seksaun Komunikasaun Autoridade Protesaun Civil (APC), João de Sousa Felipe haktuir, iha dezastre naturais ne’ebé mak akontese durante semana ida nia laran, afeita no fo ameasa tebes ba komunidade sira kuaze iha Munisipiu hotu.
“Akontesimentu Dezastre Naturais ne’ebé komunidade sira hasoru rejistu hamutuk uma-kain sanulu resin-sia (19), ho dezastre tipu oi-oin hanesan iha Munisipiu Aileu, Ahi han uma ida (1), Baucau anin sobu uma ka’in ida (1), Bobonaro anin sobu uma ka’in ida (1), Covalima anin sobu uma ka’in ida (1), Díli Bee tama uma ka’in tolu (3), no rai halai uma ka’in ida (1), Atauru bee tama uma ka’in ida (1), Ermera anin sobu uma ka’in haat (4), Oecuse anin sobu uma ka’in ida (1,) no Viqueque ahi han uma ka’in tolu (3), nune’e husi Autoridade Protesaun Civil (APC), sei responde ba sitausaun ne’ebé mak komunidade sira enfrenta.” Dehan Xefe Seksaun João de Sousa iha APC Kaikoli.
Nia afrima liután katak Autoridade Protesaun Civil (APC), buka servisu hamutuk ho paseiru relevante sira fó apoiu ona ba família afeitadu sira ne’ebé hetan dezastre naturais ne’ebé akontese ona iha semana hirak liubá.
“Autoridade Protesaun Civil (APC), ami servisu makas ho paseiru sira iha Munisipiu hodi halo verifikasaun ba komunidade afetadu hirak ne’ebé hetan estragus hanesan, sasan aat makas/Aat natoon. Autoridade Protesaun Civil (APC) responde ona Xefe família sira ne’ebé mak afeitadu hanesan aí-han. Iha semana kotuk, Autoridade Protesaun Civil (APC), ami responde ona komuidade hirak ne’ebé mak afeitadu iha dezastre ne’e hanesan Munisipiu Haat (4), Lautem, Ainaro, no Manu-fahi dadaun ne’e simu ona sasan ka metrial sira, no semana ida ne’e sei responde ba sasan matérial sira ba iha Munisipiu Ermera.” Dehan Xefe Seksaun.
Nia esklarese liután katak, iha Munisipiu Lautem Xefe família hamutuk 1.10, uma aat total 15, uma aat naton, 33, uma aat kaman, hamutuk 63, no Ainaro 37, uma aat makas 4, uma aat naton 3, no aat kaman 30, no Manu-fahi 51, uma aat makas 47, uma aat naton 2, no uma aat kaman, 2, no dadus sira ne’e rekolla husi Autoridade Protesaun Civil (APC) sei tenta hodi rezolve iha tempu tuir mai.
Reportajen : Tomás dos Santos
Foto : Tomás dos Santos
