Dili, 26 -02-2024, (TVDJ)-Tuir Porta-Voz APC Nelson Nunes Orleans hateten ohin sira hahu fó sai relatóriu semenál durante semana ida ne’e, hahú husi loron 20 to’o 26 fevereiru tinan 2024 iha rejiaun Timor-Leste, normal no akontese tipu dezastre mak CNOPC-APC rejistu uma hamutuk xefi familia 125 no mate 1 liuliu iha Munisípiu neen (6) mak hetan estragus
“Iha Munisípiu Aileu anin sobu uma 1, Munisípiu Baucau anin sobu uma 12, Munisípiu Covalima ahi-han uma 1, Munisípiu Ermera anin sobu uma 3 no rai halai 1, RAEOA bee sa’e 102 no ida lakon vida no Munisípiu Viqueque anin sobu uma 5”. Dehan Porta-Voz ne’e iha Salaun Apc Caicoli Dili.
Porta-voz ne’e akresenta liután komandu APC Minisipiu ho parseiru relevante fornese asisténsia emerjénsia ba familia afetadu sira mak hanesan ai-han (Food item), komandu operasionál Autoridade Protesaun Sivíl (APC) Munisípiu sira sei kontinua halo hela levantamentu detaillus kona-ba sasan ne’ebé estragus no lakon.
“Ami APC iha sentru evakuasaun ba iha Munisípiu rua de’it hanesan Viqueque no Covalima iha Munisípiu sira seluk sei laiha maibé ami sei lori vítima sira ba iha fatin ne’ebé seguru no dook husi inundasaun. vítima sira ne’ebé hetan dezastre ami tenke responde emerjénsia ho sasan ne’ebé importante hodi bele rekopera fali”. Dehan Porta-Voz ne’e iha Salaun Apc Caicoli Dili
Porta-voz ne’e subliña husu komunidade sira bainhira hasoru inundasaun iha fatin ne’ebé de’it apc servisu hamutuk ho parte Bomberius, risku ba dezastre nian no protesaun sivíl nian hodi halo kedas atuasaun ba iha vítima sira ne’ebé hetan dezastre. Aleinde ne’e APC nafatin foti dadus kona-ba risku dezastre sira nian, ne’ebé hela besik iha rai lolon, tanba ita atu hasai sira husi fatin ne’e maibé tenke liuhusi autoridade lokal no governu relevantes sira.
Husi parte APC nafatin fó alerta ba komunidade sira bainhira udan liuliu ba labrik sira labele haris iha mota, tanba bainhira udan mota sei sai boot no fó risku ba ema sira ne’ebé haris iha mota laran, ne’eduni husu ba maluk territóriu laran tomak tenke hadook aan husi risku dezastre sira.
Reportajén: Siga
Foto : Estefania
