Dili, 06-06-2024 (TVDJ)-Asosiasaun Jornalista Timor Lorosa’e (AJTL) halo komunikadu imprensa relasiona ho kazu tentativa husi protokolu RAEOA ba jornalista Tatóli iha loron 4 fulan Juñu 2024. Komunikadu imprensa ne’e realiza iha Edifisiu AJTL Fatuhada
Tuir portavós Acacio Pinto hateten, média no jornalista presiza livre atu hala’o sira ninia servisu iha fatin ne’ebé de’it, liu-liu iha espasu públiku hanesan instituisaun sira estadu nian ne’ebé hatur ona iha konstituisaun (RDTL) artigu 40 no 41.
“Iha rejime sistema polítika demokrasia, iha ámbitu Liberdade imprensa nian, média no jornalista presiza livre atu hala’o sira ninia servisu iha fatin ne’ebé deit. Liuliu iha espasu públiku hanesan instituisaun sira estadu nian. Iha kontestu ida ne’e presizamente tenki iha garantia ida husi aparellu estadu atu média no jornalista sira livremente halo kabertura ba asuntu no informasaun ne’ebé iha ligasaun ho servisu públiku nian sein impedementu. Espasu livre no liberdade asesu ba informasaun média no jornalista nian hatuur kedas ona iha konstituisaun (RDTL), Artigu 40 no 41, garantia Liberdade imprensa ne’e mós haktuur iha lei komunikasaun sosíal, artigu 8 no Artigu sira seluk lei komunikasaun sosial.” Dehan portavós Acacio
Nia hatutan (AJTL) durante ne’e halo advokasia hodi promove no hametin liberdade imprensa no liberadade espresaun iha país demokrátiku haree katak aktu violente pesoál protokolu (RAEOA) nian hasoru jornalista ajénsia Tatoli, Abilio Elo Nini, nu’udar tenta no ameasa ida ne’e hakanek ona liberdade imprensa no valór demokrásia.
“Asosiasaun Jornalista Timor Lorosa’e (AJTL) ne’ebé durante ne’e halo advokasia hodi promove no hametin liberdade imprensa no liberadade espresaun iha país demokrátiku ida-ne’e haree katak aktu violente pessoál protokolu (RAEOA) nian hasoru jornalista ajénsia Tatoli, Abilio Elo Nini iha loron 4 fulan juñu 2024 nu’udar tenta no ameasa ida ba independénsia jornalizmu no liberdade imprensa iha Timor-Leste, hanesan haktuir iha konstituisaun RDTL, Artigu 40 no 41 no Lei komunikasaun sosial artigu 41 kona-ba atentadu ba liberdade informasaun. Aktu violente hasoru jornalista Tatóli hakanek ona liberdade imprensa no valór demokrasia iha Timor-Leste,” Hatutan Acacio
Nia akresenta liután katak, relasiona ho aktu violentu ida ne’e afeta ba liberdade imprensa, no AJTL kontra no kondena aktu violenta hasoru jornalista Tatóli ne’ebé komete husi pesoál protokolu inresponsavél RAEOA nian tanba aktu violente ne’e sei hatauk jornalista no média iha kontestu kobertura.
“AJTL haree katak aktu violentu ida-ne’e sei afeita index ranking liberdade imprensa iha tinan sira tuir mai. Bazeia ba faktu no situasaun ne’ebé temi ona, AJTL hakarak hato’o ninia posisaun hanesan tuir mai: AJTL kontra no kondena aktu violenta hasoru jornalista Tatóli ne’ebé komete husi pesoál protokolu inresponsavél RAEOA nian tanba aktu violente ne’e sei hatauk jornalista no média atu iha kontestu kobertura no públikasaun notísia, liu-liu atu garante papél média kontrolu sosiál. AJTL mós konsidera aktu violenta ida ne’e la hatudu mentalidade demokrátiku pesoál entidade sira estadu nian atu garante boa governasaun no kontabilidade iha país demokrásia Timor-Leste. Maibé hatudu fali mentalidade vandalizmu hodi impede média no jornalista sira atu asesu ba informasaun ne’ebé iha ligasaun ho servisu públiku nian,” Hatutan Nia
Aleinde ne’e AJTL husu ba Prezidente RAEOA, atu foti medida no sansaun forte hasoru pesoál protokolu ne’ebé halo aktu violentu hasoru jornalista Tatóli iha espasu públiku, no husu ba SECOMS atu komunika ho instituisaun hotu atu respeita jornalista nia servisu, nomos husu Jornalista sira atu nafatin kumpre kódigu étika jornalizmu.
“Ho pozisaun ida ne’e, AJTL husu ba Prezidente RAEOA, Sr. Tiago Lobato atu foti medida no sansaun forte hasoru pesoál protokolu ne’ebé halo aktu violentu hasoru jornalista Tatóli iha espasu públiku iha Oecusse Ambeno. Husu SECOMS atu komunika ho instituisaun sira estadu nian atu respeita média no jornalista nia servisu no kolaborasaun atu sira livre asesu ba espasu públiku hotu hodi asesu informasaun sein iha impedimentu. Konsellu imprensa no asosiasaun jornalista hotu atu kontinua sosializa lei komunikasaun sosiál ba entidade estadu sira nian, liu-liu entidade RAEOA atu sira komprende papél média no jornalista nian iha país demokrátiku ida ne’e. jornalista no kanál média hotu-hotu iha rai laran atu fó soliedariedade ba malu hodi kontinua públika kazu ne’e tó hetan solusaun lolo’os no justu.” Hatutan Portavós
Atu esplika de’it katak jornalista mak sai hanesan ajente transformadór, tanba ne’e Jornalista no kanál hotu-hotu atu nafatin kumpre kódigu étika jornalizmu, lei komunikasaun sosiál no prínsipiu sira jornalizmu nian bainhira hala’o kna’ar jornalizmu iha ne’ebé de’it atu nafatin asegura no garante liberdade imprensa no liberdade espresaun iha Timor-Leste.
Reportajen : Ekipa estajiada
Foto: Dodi
